Tunngaviusumik paasissutissat
Tunngaviusumik paasissutissat tassaapput paasissutissat innuttaasunit, suliffeqarfinnit oqartussaaffeqarfinnillu atoqqissinnaasut.
Tunngaviusumik paasissutissat taamaalillutik paasissutissaapput inuiaqatigiinni ataatsimoorussaasumik tunngaviusumik katersugaatigineqartut. Paasissutissat qulequtakkaarlugit qitiusumik nalunaarsuiffinniitinneqarput, taamaasillutillu paasissutissat pitsaasumik, isumannaatsumik aaqqissuussaasumillu saqqummiunneqarsinnaanngorlutik. Nalunaarsuiffinni paasissutissat pitsaasusaat aaqqissugaalluarnerilu qulakkeerniarlugit ataavartumik nutarterneqartarput.
Digitalinngortitsinermut Aqutsisoqarfiup, oqartussaaffeqarfiit kommunillu suleqatigalugit, inuiaqatigiinnut iluaqutaasussanik tunngaviusunik paasissutissanut nalunaarsuiffiliorpoq.
Inuiaqatigiinnut tunngaviusumik paasissutissaliornermi piumasaqaatit malitassat tassaapput pitsaassutsit qaffasissut ilusilersuilluaanerlu.
Tunngaviusumik paasissutissat pisortanit nalunaarsorneqassapput, kikkunnillu tamanit ajornaatsumik isumannaatsumillu atorneqarsinnaassallutik – oqartussaaffeqarfinnit, suliffeqarfinnit innuttaasunillu.
Indhold
Tunngaviusumik paasissutissat iserfigisinnaasatit makkuupput:
- Najukkanut nalunaarsuiffik
- Qitiusumik Inuit Nalunaarsuiffiat (CPR), suliffeqarffiillu Qitiusumik Nalunaarsuiffiat (CVR)
- Nunat aqqinut nalunaarsuiffik
Saqqummiunneqartussatut sulissutigineqartut tassaapput:
- Nunaminertanut inniminniinermik nalunaarsuiffik
- Inissianut sanaartukkanullu nalunaarsuiffik
Quppernerni allani tunngaviusumik paasissutissanut nalunaarsuiffiit assigiinngitsut pillugit paasissutissat atuarsinnaavatit.
Tunngaviusumik paasissutissat atorneqartarneri, nittartakkakkut kiffartuussissutinut pitsaanerusunut amerlanerusunullu atorneqarsinnaanerinik, innuttaasunut kinguneqarpoq. Assersuutigalugu kommunini digitalikkut nuunnermi imminut sullississummiittumi najukkanut nalunaarsuiffimmit paasissutissat atorneqarput.
Tunngaviusumik paasissutissat atorneqarnerini aamma allaffissornikkut sulianik ingerlatsinermi paasissutissat ataqatigiinnerusut, erseqqinnerusumillu ingerlatsineq innuttaasunut ataasiakkaanut qulakkeerneqarsinnaavoq.
Tunngaviusumik paasissutissanut atuisinnaaneq pisortani namminersortunilu pitsaanerusumik sullissineq allaffissornerlu periarfissaalerput. Assersuutigalugu Inissianut Sanaartukkanullu nalunaarsuiffimmit (BBR) paasissutissat kommunip atorsinnaavai, ilaatigut illup pisoqaassusaa, atorneqarnera aamma sanaartorneqarnerani atortussiat qaliallu suunersut pillugit paasissutissanik pisariaqartitsiguni. Assersuutigalugu sumiiffinni pisariaqartitsiffiunerpaasuni nutartigassanik imaluunniit sanaartugassanik pingaarnersiuiniaraanni, paasissutissat taakku atorlugit toqqammaviliisoqarsinnaavoq.
Assersuut alla tassaavoq Qitiusumik Inuit Nalunaarsuiffiat (CPR) aamma Qitiusumik Suliffeqarfiit Nalunaarsuiffiat (CVR) tunngavigalugit, tunngaviusumik paasissutissanik allanik ilallugit oqartussaaffeqarfimmeersunit suliffeqarfimmeersunnilluunniit paasiissutissanik ilagaanni, pisortani namminersortunilu kiffartuusseriaatsinut nutaarluinnarnut tapersiisinnaapput.
Ataatsimut isigalugu tunngaviusumik paasissutissat atorlugit ilisimasaqarluarluni aalajangiinissamut digitalikkullu kiffartuussissutinik nutaanik pilersitsinermut periarfissiipput. Aamma siunnerfeqarnerusumik pitsaanerusumillu aqutsinissamut qulakkeerinnillutik, tamannalu ataatsimut isigalugu innuttaasunut inuiaqatigiinnullu iluaqutaasussaallutik.
Attavissaq
Tunngaviusumik paasissutissanut tunngatillugu apeqqutissaqaruit, Digitalinngortitsinermut Aqutsisoqarfimmut saaffiginnissinnaavutit uani digitalisering@nanoq.gl