Digitalinngortitsinermi periusissiaq
Indhold
Innuttaasut, suliffeqarfiit oqartussaaffeqarfiillu akornanni sukkanerusumik pisariinnerusumillu attaveqaqatigiinnissamut digitalinngortitsineq pitsaanerpaamik tunngaviuvoq. Aammattaaq digitalinngortitsinikkut Kalaallit Nunaanni pisortani ataatsimut nunap iluani ajornaatsumik isumannaatsumillu suleqatigiinnissamut tunngaviliilluni. Digitalinngortitsinerup periarfissasa angulluarnissaannut ataatsimoorussamik siunnerfeqartariaqarpoq.
Naalakkersuisut Digitalinngortitsinermut periusissiaa 2024-2028 Kalaallit Nunaanni digitalinngortitsinerup suliarineqarneranut toqqammaviuvoq.
Digitalinngortitsinermi periusissiaq 2024-2028 uani aasinnaavat
Periusissiami sammisat
Periusissiaq sammisanut tallimanut agguagaavoq. Sammisat qulaani taakkartorneqartut qanillisitsisinnaaneri pillugit toqqarneqarsimapput, innuttaasut pisortaqarfinnut, suliffeqarfiillu imminnut qanillisinnaapput taamaaliornerminnilu sillimaniarneq pitsanngorsarneqarsinnaallunilu ammanerusumik ingerlatsisoqarsinnaassaaq.
”Digitalinngortitsinermi tunngavissaq”-mi anguniarneqartut tassaapput suleriutsit kiffartuussissutillu pitsaasumik atorluarsinnaasunillu digitaliseererneqarnissaat, aammalu pisortaqarfinni assigiimmik digitalimik atuinerup siuarsarneqarneratigut ingerlatsinerit pisariillisarneqarnissaat. Digitalinngortitsinermi aaqqissuussissutinik ersarissumik suliaqarnikkut aqutsisoqarneratigullu aporfiusinnaasut suussusersineqarlutillu piffissaatillugu iliuuseqarfigineqartassapput.
Kalaallit Nunaat nunarsuarmi attaveqaatinut atassuteqarpoq. Geopolitiskimik soqutigisat inissisimaffiullu soqutigineqarnera eqqarsaatigalugu Kalaallit Nunaanni nittartakkatigut sillimaniarneq pitsanngorsarniarlugu iliuuseqartoqartariqarpoq – taamaattumik ”Paasissutissanut nittartakkatigullu sillimaniarnissaq pitsaaneq” digitalinngortitsinermut periusissiami matumani sammineqarpoq.
Paasissutissanut nittartakkatigullu sillimaniarnermi digitalimik systemip illersorneqarnissaa kisiat pinnagu – innuttaasut illersorneqarnissaat pineqarpoq. Naalakkersuisunut pingaaruteqartorujussuuvoq qulakkiissallugu Kalaallit Nunaanni innuttaasut ulluinnarni digitalimik qanoq qularnaatsumik periuseqarsinnaallutik ilisimasaqarnissaat – aammalu pisortaqarfiit namminersortullu nittartakkatigut saassunneqarsinnaanermut qanoq imminnut illersornerusinnaanerlutik ilisimasaqarnissaat.
Paasissutissat aallaavigalugit siunissami periusissagut suliffeqarfinnillu ingerlatseriutissagut takuneqarsinnaapput, paasissutissammi aallaavigalugit aalajangiisartut innuttaasut atuisullu iliuuserisartagaannik pissusaannillu nalunaarfigineqarsinnaapput. Silassorissuutitaq imaluunniit silassorissuutitat pilersitsisartut atorlugit suliffeqarfiit eqqarsarluarnerusumik pitsaanerusumillu ingerlanneqarsinnaapput. Taamaaliortoqarsinnaassappalli paasissutissat atorneqartariaqarput silassorissuutitarlu paasissutissat atorlugit sungiusarneqartariaqarluni.
Naalakkersuisunit inuiaqatigiit ammanerunissaat anguniarneqarpoq, kikkulluunniit sumiluunniit najugaqaraluarunik pisortaqarfinniittunik takusaqarsinnaassapput. Assigiissaarineq tunngavigalugu digitalinngortitsinikkut siunertalimmillu ineriartortitsininikkut paasissutissanillu atuinikkut anguniagaq una anguneqarsinnaavoq.
Sulissivik.gl pisortaqarfiit tamanut digitalimik aaqqiissutaannut katersuuffiuvoq, sumiiffimmilu ataatsimi innuttaasut suliffeqarfiillu paasissutissanik ujartuisinnaapput. Saaffissaq inuiaqatigiinnut pingaaruteqarluinnartoq tunngaviusumik digitalimik attaveqaataavoq, taamaattumillu innuttaasut suliffeqarfiilu digitalimik ineriartorneri malinnaaffiginiarlugit ingerlaavartumik nutarterneqartariaarluni.
Sullissivik.gl Kalaallit Nunaanni digitalimk allanngoriartornermut pingaaruteqartorujussuuvoq, taamaattumik ”Sullissivik.gl” nuna tamakkerlugu digitalinngortitsinermi periusissiani ilaajuaannartussaalluni.
Digitalimik ineriartorneq tunngavigalugu Kalaallit Nunaanni innuttaasut digitalimik aaqqiissutinik saqqummiiffigineqartuaannartussaapput, taamaattoqarneratalu kingunerisaanik pisortaqarfinni digitalimik piginnaasaqarnissamut piumasaqaatit annertusigaluttuinnarput.
Kalaallit Nunaanni, Nunanilu avannarlerni digitalimik ineriartornerup sukkasoorujussuup kingunerisaanik innuttaasut digitalimik aaqqiissutinik atuisinnaanngitsut ukkatarineqarnerusariaqalerput. Sammisarlu una pingaartinneqartorujussuuvoq, taannami aqqutigalugu digitalimik aaqqiissutini atuuttuni ineriartortitanilu digitalimik peqataatitsineq ataqatigiissarnerusumik qulakkeernierneqartussaagami.
Attavigitigut
Digitalinngortitsinermut periusissiaq pillugu apeqqutissaqaruit, attaveqarsinnaavutit uunga digitalisering@nanoq.gl